ატლანტიკის ომის თეატრი
ატლანტიკის ომის თეატრი – ატლანტის ოკეანის ჩრდილოეთი ნაწილის აკვატორია კუნძულებით და არქიპელაგებით. მოიცავს არეს არქტიკიდან ჩრდილოეთ ტროპიკებამდე კონტინენტების სანაპირო ზონებით და საჰაერო სივრცით მათ თავზე. მის ფარგლებში, აშშ-ებისა და ჩრდილო-ატლანტიკური ალიანსის (ნატო) სამხედრო ხელმძღვანელობის შეხედულებით, შეიძლება წარიმართოს სტრატეგიული მასშტაბის სამხედრო მოქმედებები.
ატლანტიკის ომის თეატრი დაყოფილია სამ საოკეანო ზონად: დასავლეთ ატლანტიკად, აღმოსავლეთ ატლანტიკად და იბერიის ატლანტიკად (ფაქტობრივად, დამოუკიდებელი საომარი მოქმედებების თეატრად), რომლებიც, თავის მხრივ, დაყოფილია რაიონებად.
შეერთებული შტატებისა და ნატოს სარდლობა ატლანტიკის ომის თეატრს მიიჩნევენ ერთ-ერთ მთავარ საოკეანე თეატრად. მის ფარგლებში შექმნილია ნატოს გაერთიანებული შეიარაღებული ძალების უმაღლესი მთავარსარდლობა ატლანტიკაში (შტაბი ქ. ნორფოლკში, აშშ), რომელიც აკონტროლებს 42 მლნ. კვ.კმ. ოკეანის აკვატორიას.
ნატოს ატლანტიკის გაერთიანებული შეიარაღებული ძალების შემადგენლობაში შედის შეერთებული შტატების, დიდი ბრიტანეთის, კანადის, ნიდერლანდებისა და პორტუგალიის სამხედრო-საზღვაო ძალები. ისინი განლაგებულია საბრძოლო მოქმედებების წარმოებისათვის მთავარი სარდლობების ფარგლებში (მშვიდობიანობის დროს ფუნქციონირებენ მხოლოდ (შტაბები) დასავლეთის (ნორფოლკი, აშშ), აღმოსავლეთის (ნოტვუდი, ლონდონის გარეუბანი, დიდი ბრიტანეთი) და იბერიის (ლისაბონი, პორტუგალია) ატლანტიკაში. ასევე ატლანტიკის დამრტყმელი ფლოტის სარდლობისა და გაერთიანებული წყალქვეშა ძალების სარდლობის ფარგლებში. ნატოს ატლანტიკის გაერთიანებული შეიარაღებული ძალების შემადგენლობაში, გარკვეული პირობებით, შეიძლება გამოიყოს საფრანგეთის, ესპანეთისა და გერმანიის სამხედრო-საზღვაო ძალების ხომალდები.
ატლანტიკის ომის თეატრის სტრატეგიული მნიშვნელობა განისაზღვრება მისი როლით საოკეანო და საზღვაო კომუნიკაციების წარმატებულ ფუნქციონირებაში, რათა უზრუნველყოფილ იქნეს ჯარებისა და ტვირთის სტრატეგიული გადასროლა ამერიკიდან ევროპაში.
ატლანტიკის ომის თეატრს ეკვრის ევროპის ომის თეატრი.
ატლანტიკის ომის თეატრში შექმნილია სამხედრო-საზღვაო ძალების ბაზირების, ლოგისტიკის, თვალთვალისა და დაზვერვის, მართვისა და კავშირგაბმულობის, რადიოსანავიგაციო უზრუნველყოფის განვითარებული სისტემები.
თეატრის სამხედრო-საზღვაო ინფრასტრუქტურა განუწყვეტლივ იხვეწება. ამასთან, ფართოდ გამოიყენება რეგიონის ქვეყნების კუთვნილი ტერიტორიები და სამფლობელოები სხვა ქვეყნებში. მაგალითად, ამერიკის შეერთებული შტატების მფლობელობაშია ან იჯარით აქვს ბაზები ისლანდიაში, დიდ ბრიტანეთში, ესპანეთში; ბერმუდის, ბაჰამის, ანტილის კუნძულები; კუბის კუნძულზე (გუანტანამო), აბორისა და კანარის კუნძულებზე; დიდ ბრიტანეთს – ბაჰამის, ანტილის, ფოლკლენდის (მალვინის) და ამაღლების კუნძულებზე. გათვალისწინებულია ნატოს ძალების მოქმედებისა და მუდმივი ყოფნის ზონის გაფართოება ჩრდილოეთ ტროპიკების სამხრეთით.
